Psalms 45
PESALEM 45
Kiŋ gêjam awê ŋawê
1Biŋ êjam-êjam kêôliŋ kêpi aŋga aêŋoc ŋalêlôm tec gebe ênsêwa êsa. Amboac tonaŋ jansuŋ ŋoc wê êndêŋ kiŋ.Imbeloc kêtôm ŋac lêmagaôŋa keto kêlêpê.
2Aôm laŋômanô ŋajam kêlêlêc ŋamalac samob, taŋ sêŋgôŋ nom naŋ, nêŋ su. Gêdômôlic e têtac kêsa laŋgwageŋ.
Amboac tonaŋ tec Anôtô gêjam mec aôm gedeŋ tôŋgeŋ.
3O ŋactêkwa, ôjandiŋ nêm siŋ êŋkaleŋ magim.
Nêm laukasap e ŋawasi laŋgwageŋ.
4Ajôc, ŋac tau, ônac siŋ taumaŋ. Ôŋgôm êtu biŋŋanôŋa to ôpuc biŋgêdêŋ tôŋ.
Ma lêmam anôŋa êwaka nêm ŋaclai kapôêŋ sa.
5Aômnêm sôb ŋamatagosu keseŋeŋ kiŋnê ŋacjo nêŋ nipkalop tôŋ
ma tenteŋlatu samob sêu tauŋ jasêc amkaiŋ ŋalabu.
6Aômnêm lêpôŋ, taŋ Anôtô kêpuc tôŋ naŋ, êkô teŋgeŋ to teŋgeŋ.
Aôm gôjam gôliŋ nêm lau ŋa biŋgêdêŋ.
7Aôm têmtac gêwiŋ biŋgêdêŋ ma nêm ŋalêlôm kêmoatiŋ tôŋ kêtu biŋ alôb-alôbŋa.
Amboac tonaŋ Anôtô, taŋ kêtu nêm Anôtô naŋ, geŋ oso aôm ŋa niptêkwi têntac ŋajamŋa e kôlêlêc samob su.
8Lakisia to môsê ma samboa ŋamalu kêsa aŋga nêm ŋakwê.
Êsêac sêjam wê sêŋgôŋ andu, taŋ sêgêlôŋ ŋa bôc ŋajabo naŋ, e gêgôm aôm têmtac ŋajamanô.
9Kiŋ latuŋio sêmoa sêwiŋ lauo ŋagêdô aŋga nêm andu.
Ma nêm awê togêlôŋ gold Opirŋageŋ kêkô aômnêm anôŋa.
10O latucoenec, matam ê aê ma ôkêŋ taŋam ŋoc biŋ.
Ôliŋ nêm lau to tamamnê andu siŋ.
11Ma embe kiŋ têtac êkac eŋ êtu aôm laŋômanô ŋajamŋa,
naŋ ôkêŋ êwiŋgeŋ gebe eŋ kêtu nêm ŋatau.
12Lau Tirusŋa oc sênsuŋ awa êndêŋ aôm.
Ma lau tolêlôm oc têtu kêka-kêka gebe aôm ôlic êsêac ŋajam.
13Kiŋ latuo gêmoa andu kiŋŋa ŋalêlôm togêlôŋ ŋawasi laŋgwageŋ.
Ênê ŋakwê sêwa gam gold gêwiŋ.
14Êsêac sêwê eŋ, taŋ kêsô ŋakwê talô-talô sa naŋ, dêdêŋ kiŋ sêja.
Ma sêwê ênê sakiŋwagao toôŋgeŋ dêdêŋ kiŋ sêja amboac tonaŋgeŋ.
15Sêjam lasê ma sêwê êsêac toôndugeŋ
ma jasêsô kiŋnê andu ŋalêlôm sêja.
16Aôm ôtap latômi taêsam sa, taŋ sêjô tamami su naŋ.
Aôm oc ôkêŋ êsêac têtu kasêga aŋga gamêŋ samob.
17Aê oc jakêŋ lau wakuc ŋamuŋa samob taêŋ ênam aôm ŋapaŋ.
Amboac tonaŋ tenteŋlatu aweŋ êôc aôm teŋgeŋ to teŋgeŋ.
▼
▼Lau Kora nêŋ wê têntac gêwiŋ tauŋŋa teŋ.
Copyright information for
JAE